ரூ.900 தராமல் "90' ஐ அலைக்கழிக்கும் தொடக்கக் கூட்டுறவு வங்கி அதிகாரிகள் !!!

by **கிருஷ்ணன்** Fri Jul 16, 2010 1:48 pm

ராமநாதபுரம் : வங்கியிலுள்ள தனது பணம் 900 ரூபாயைதராமல் பல ஆண்டுகளாக கூட்டுறவு வங்கிஅதிகாரிகள் அலைக்கழித்து வருவதாக, ராமநாதபுரம் மாவட்டம் பார்த்திபனூரை சேர்ந்த 90 வயது மூதாட்டி லட்சுமி புகார் தெரிவித்து உள்ளார். பார்த்திபனூர் கிழக்குத் தெருவை சேர்ந்தவர் லட்சுமி. 20 ஆண்டுகளுக்கு முன் பார்த்திபனூரில் உள்ள தொடக்க வேளாண் கூட்டுறவு வங்கியில் சிறிய தொகையை போட்டு உள்ளார்.

ஆண்டுகள் கடந்த நிலையில், லட்சுமியின் வாழ்க்கையில் பல்வேறு மாற்றங்கள் ஏற்பட்டன. கவனிக்க ஆளின்றி, பல்வேறு சிரமங்களுக்கு மத்தியில் வங்கியில்பணம் போட்ட ஞாபகம் வந்தது. 2002 டிச.,11ல் வங்கிக்கு சென்று அணுகிய போது, வட்டித்தொகை சேர்த்து 2445 ரூபாய் 75 காசு இருப்பது தெரியவந்தது. ஆதரவின்றி தவிக்கும் தனக்கு இத்தொகை உதவியாக இருக்கும்என்பதால், அதை பெறுவதற்கான முயற்சியை 2002ல் தொடங்கினார். 2004 ஏப்., 13ல் நடந்த மக்கள் குறைதீர்க்கும் நாள் கூட்டத்தில் புகார் செய்ததால், 1545 ரூபாய் மூதாட்டிக்கு கிடைத்தது. மீதமுள்ள 900 ரூபாய் 75 காசுக்கு பல ஆண்டுகளாக அவரை அலைகழித்து வருகின்றனர். இது குறித்து புகார் தெரிவிக்க ராமநாதபுரம் வருவதற்கு கூட மூதாட்டிக்கு பணம் இல்லை. தன்னால் முடிந்த வேலையை பார்த்து, கடந்த ஆறு ஆண்டுகளாக சேர்த்த பணத்தில், நேற்று ராமநாதபுரம் வந்த அவர், மக்கள் குறைதீர்க்கும் நாள் கூட்டத்தில் டி.ஆர்.ஓ., பாலசுப்பிரமணியத்திடம் புகார் செய்தார்.

அவர் கூறியதாவது: வங்கியிலிருந்துஎன்னுடைய பணத்தை தர மறுக்கின்றனர். வங்கியில் போய் கேட்டால் பதில் கூட கூற மறுக்கின்றனர். புகார் தெரிவிக்க கூட பணமில்லை. மாட்டு சாணத்தை எருவாக்கி, விற்று கிடைத்த பணத்தில் எனது பசியை போக்கி, அதில் மிஞ்சியதை சேமித்து புகார் தெரிவிக்க வந்தேன். என்னால் நிற்க கூட முடியவில்லை. எனக்குரிய பணத்தை பெற்றுத்தர வேண்டும், என்றார்.

டி.ஆர்.ஓ., கூறுகையில், ""இந்த புகார் மீது சிறப்பு கவனம் செலுத்தி, முதாட்டிக்கு சேர வேண்டிய தொகையை வீடு தேடி சென்று வழங்க நடவடிக்கை எடுக்கப்படும்,''என்றார்.