ஆடுகளம் - சிறப்பு விமர்சனம்

by **priyakutty** Thu Jan 20, 2011 6:11 pm

ஆடுகளம் - சிறப்பு விமர்சனம்

தமிழ்
சினிமாவுக்கு மீண்டும் ஒரு மதுரை வாசம். அது என்னமோ என்ன மாயமோ தெரியல...
மதுரையை மையமாக வைத்து எடுக்கிற படம் எல்லாம் வரிசையாக ஹிட். அந்த
வகையில் ஆடுகளம் இன்னொரு ஹிட். தனுஷுக்கு நீண்ட இடைவேளைக்குப் பிறகு
நெத்தியடி அடிக்கிற மாதிரி ஒரு படம். பொல்லாதவனுக்குப் பிறகு தெளிவான ஆய்வுகளோடு ஆடுகளத்தில் இறங்கி இருக்கிறார் இயக்குனர் வெற்றிமாறன்.

சேவல்
சண்டையில் பேட்டைக்காரன் (ஜெயபாலன்) சேவல்கள் தோற்றதாக சரித்திரமே இல்லை.
சேவல்களை வளர்ப்பதிலும் வித்தைகளை கற்றுத் தருவதிலும் வல்லவன் பேட்டைக்காரன்.
இவரிடம் இருக்கும் பசங்களில் இவர் நம்புவது ரெண்டே பேர்தான், ஒருவன்
கருப்பு (தனுஷ்) இன்னொருவன் துரை (கிஷோர்). ஆனால் பேட்டைக்காரன் சேவலை
எப்படியாவது தோற்கடித்து விட
வேண்டும் என்கிற லட்சியம் ரத்னசாமிக்கு. ரத்னசாமி (நரேன்) போலிசாக
இருந்தாலும் சேவல் சண்டையில் வெற்றி பெறுவதில்தான் தன் மானமே அடங்கி இருக்குன்னு நினைக்கிறவர்.

சேவல்
சண்டைகளில் கருப்பு வளர்க்கும் சேவல் சக்கைபோடு போடுது. எந்த சேவலாக
இருந்தாலும் சரி... கருப்போட சேவல் அதை வென்றுவிடுகிறது. இன்னொரு பேட்டைக்காரன்
என்று பெயர் வாங்கி விடுகிறான் கருப்பு. இங்க தான் பிரச்சனையே... கருப்பு
வளர்வது பேட்டைக்காரனுக்குப் பிடிக்காமல் போக. கருப்பின் கதையை முடிக்க
பிளான் போடுகிறார். இல்லாத சங்கதிகளை இருப்பதாக சொல்லி துரைக்கும்
கருப்புக்கும் சண்டை மூட்டி விடுகிறார். கடைசியில் ஆறுதலான க்ளைமாக்ஸ்!

இதுல
எங்க இருந்து ஹீரோயின் வந்தாங்க என்று கேட்கிறீங்களா? ஹீரோயின்
இல்லைன்னாலும் கதை இருக்கும். இருந்தாலும் தமிழ் படத்துல ஹீரோயின்
இல்லாமலா? ஆனாலும் அந்த வேலையையும் ரொம்ப எதார்த்தமா செய்திருக்கிறார் வெற்றிமாறன். ‘ஐரின்’ கதாபாத்திரத்தில் ஆங்கிலோ இந்திய பெண்ணாக டப்சி. ஒரு வித்யாசமான ஹீரோயின்.

அழுக்கு
லுங்கி கசங்கின சட்டையோடு தனுஷ் ஒரு துடிப்பான தோற்றம். தமிழும்
இங்கிலீஷும் கலந்தா மாதிரி மதுரை நகர பாஷை பேசும் போது தனுஷை வெற்றிமாறன்
எவ்வளவு வேலை வாங்கி இருக்காருன்னு தெரியுது. எழுத்தாளர் ஜெயபாலன் நூறு
படத்துல நடித்தவர் மாதிரி அப்படி ஒரு நடிப்பு. கிஷோர், பல படங்களில் கலக்கியவர்.
இதிலும் அளவான நடிப்பு. அவருக்கு இயக்குனர் சமுத்திரக்கனி பின்னணி குரல்
கொடுத்திருப்பது கூடுதல் பலம். புதுமுக ஹீரோயின் டப்சி, பெப்சி மாதிரி ரொம்ப கூல்.

படத்தின்
முதல் பாதி சர சர வேகம். இரண்டாவது பாதியில் ஒரு வேகத்தடை போட்ட மாதிரி
கொஞ்சம் செண்டிமெண்ட் காட்சிகள். ஒரே அடிதடின்னு இருந்தா எப்படி? பெண்களுக்காக
சில காட்சிகள் வேண்டாமா... அதுவே ஓவர் செண்டிமெண்டாக இல்லாமல்
இருந்தவரைக்கும் நல்லது. காரணம் இல்லாத கதாப் பாத்திரங்கள் தேவை இல்லாத காட்சிகள், இவை எல்லாம் ஓரம் கட்டி விட்டு கதைக்கு எது தேவையோ அதை செய்திருக்கிறார் வெற்றிமாறன்.

ஜி.வி.பிரகாஷின்
பாடல்களில் யுவன் ஷங்கர் ராஜாவின் சாயல் இல்லாமல் இல்லை. சினேகனின்
வரிகளில் 'வெள்ளாவியில் வெச்சுத்தான் வெளுத்தாய்ங்களா, உன்ன வெயிலுக்கு
காட்டாமல் வளர்த்தாய்ங்களா...' ரசிகர்களின் சரமாரியான கைதட்டல்களோடு 'யாத்தே யாத்தே' பாடல் பட்டையை கிளப்புகிறது.

கிராபிக்ஸில் காட்டப்படும் சேவல் சண்டைகளிலும் ஹீரோயிசத்துக்கான சஸ்பென்ஸ் தக்க வைத்திருப்பது சபாஷ். சன் பிக்சர்ஸ், தரமான படம் என்று தைரியமாக சொல்லிக் கொள்ளலாம். வெற்றிமாறனின் இன்னொரு வெற்றி!

வெற்றிக்களத்தில் 'ஆடுகளம்'